Seks fólk deyð í skriðulopi

Seks fólk eru nú funnin deyð í skriðulopinum í Gjerdrum norðanfyri Oslo. Hini fýra, sum ikki hava latið frætta frá sær eftir skriðulopið mikudagin, eru ikki funnin enn. Tað skrivar NRK í dag.

Tað var tíðliga í morgun, at ein fimti persónur varð funnin deyður og fyri lítlari løtu síðani, var ein sætti persónur funnin deyður. Løgreglan vil enn ikki siga nakað um kyn ella aldur.

Átaksleiðarin á staðnum sigur í viðmerking til NRK, at bjargingarfólk halda fram við at leita allan sunnudagin og eisini út á náttina, um tað gerst neyðugt.

Kongshúskið vitjaði í dag

Talan er enn um eina bjargingarroynd, og er tað sostatt hugsandi, at bjargingarfólkini fara at finna tey saknaðu á lívi.

Harald Kongur, Sonja Drotning og Haakon Krúnprinsur av Noregi, vijaðu í dag Gjerdrum. Tey vístu samkenslu við teimum, ið hava mist hús og heim, og við avvarðandi hjá teimum saknaðu.

Skriðan í Gjerdrum er umleið 300 metrar breið og umleið 700 metrar long. Níggju bygningar, har 31 húski hava búð, eru farin í skriðulopinum. Seks bilhús eru eisini farin í skriðulopinum.

Skriðan ger enn um seg og vandi er tí fyri, at fleiri hús kunnu fara í skriðuni, og hetta ger eisini bjargingararbeiðið sera vandamikið, skrivar VG.