Útflyta laks við skipi

Felagið fer síðst í februar at skipa so fyri, at siglingin til USA og Kanada tekur minni tíð, so til ber at sigla við ófrystari vøru. Ferðaætlanin verður broytt, so skipini leggja at í færri havnum á leiðini vestur.

Í fyrsta umfari verður talan um laks, men seinni verða annar fiskur og aðrar vørur eisini flutt. Eimskip fer eisini at leggja dent á umhvørvisvinaligan flutning.

Vilhelm Már Þorsteinsson, forstjóri í Eimskipi, sigur í tíðindaskrivi, at flutningur við skipi gevur minni CO2-útlát enn flutningur við flogfari.

Sambært honum er munurin øgiliga stórur. Eitt tons, sum verður flutt við skipi og bili, gevur 95 prosent minni útlát enn flutningur við flogfari.