Løgmaður: Trygdarráðið tekur onga avgerð

Nýggja trygdarráðið, sum løgmaður hevur sett á stovn, skal kunna seg um og viðgera trygdarpolitisk viðurskifti, men fer ikki at taka beinleiðis avgerðir á økinum.

Tað sigur Bárður á Steig Nielsen, løgmaður, í svari til munnligar fyrispurningar frá Høgna Hoydal úr Tjóðveldi. Høgni Hoydal spurdi millum annað um, hvørjar uppgávur og heimildir nýggja trygdarráðið hevur.

Løgmaður sigur, at trygdarráðið hevur við sær, at landsstýrið í størri mun fer at fáa loyniliga vitan um trygdar- og verjumál, og at tað situr ein bólkur í landsstýrinum, sum hevur til uppgávu at halda seg kunnaðan um trygdarpolitisk viðurskifti.

Landsstýrismaðurin tekur formligu avgerðirnar

Tað er tó framvegis landsstýrismaðurin í uttanríkismálum, sum varðar av og tekur formligar avgerðir á økinum eftir at hava tikið løgtingið við uppá ráð, sambært stýrisskipanarlógini.

Í trygdarráðnum sita løgmaður, landsstýrismaðurin í uttanríkis- og mentamálum og landsstýrismaðurin í fíggjarmálum, umframt nøkur embætisfólk.

Trygdarráðið er ein avleiðing av spentu støðuni millum tey trý stórveldini USA, Russland og Kina.