Spyr nú aftur um nevndir og ráð

Løgmaður hevur nú fingið spurningarnar um nevndir og ráð í skrivligum fyrispurningi, sum hann sjálvur mælti til, tá ið hann fekk spurningarnar eftir grein 52a í tingskipanini.

Høgni Hoydal í Tjóðveldi vil hava at vita, hvussu nógv fólk, løgmaður og hini í landsstýrinum hava sett í nevndir og ráð síðani valið í 2019, og hvørji tey eru.

Tað skilst á spurningunum, at landsstýrisfólkini velja síni egnu fólk í nevndir og ráð, millum annað fyrrverandi tingfólk úr egnum flokki. 

Atkvøða týsdagin 

Løgmaður vísti á tingskipanina, sum sigur, at ein grein 52a spurningur skal vera stutt og greitt orðaður.  

Tað er spurningurin hjá Høgna Hoydal ikki, skiltist á svarinum hjá løgmanni.

Hann er langur og sera umfatandi, segði Bárður á Steig Nielsen.

Á næsta tingfundi, sum verður týsdagin, skal løgtingið atkvøða, um skrivligi fyrispurningurin hjá Høgna Hoydal skal svarast.