Klaksvík skal hava nýggjan kommunustjóra

Klaksvíkar kommuna skal hava nýggjan kommunustjóra.

Tummas Eliasen fer frá fyri aldur. Hann hevur verið kommunustjóri í meira enn átta ár.

Kommunustjórin er ovasti umsitingarleiðari í kommununi, og hevur ábyrgdina av dagligu leiðsluni og menningini av Klaksvíkar Kommunu og stovnum í kommununi. 

Kommunustjórin skal tryggja, at uppgávurnar verða loystar á høgum stigi, og at bygnaður og mannagongdir eru í samsvari við nútímans krøv.

Setast frá 1. juli

Hann skal millum annað eisini tryggja, at politiskar avgerðir verða framdar í verki, hann er ráðgevi hjá borgarstjóranum og býráðnum, og skal tryggja, at kommunan lurtar eftir borgarum, vinnuni, umheiminum og aktuellum kommunalum áhugamálum, skrivar Klaksvíkar kommuna á heimasíðuni.

Starvið verður sett frá 1. juli í ár, og tað er lønt í 38. lønarflokki hjá Tænastumannafelagnum, uttan at vera tænastumannastarv.

Eisini verða 15 prosent í eftirlønargjaldi.

Evstamark at søkja er 6. apríl.