Smápartafelag hjá Bjørn á Heygum nýtt til hýrur

Í sendingini Teir Ómettiligu kom fram, at eitt føroyskt felag, Tindhólmur, sum Bjørn á Heygum var nevndarformaður í, var brúkt at sleppa undan at rinda skatt í Namibia, sambært varskógvaranum í málinum.

Tá segði Bjørn á Heygum seg einki kenna til flytingarnar. Nú er tó greitt, at eisini Sp/F Bjørn á Heygum er nýtt til at rinda hýrir til íslendskar sjómenn í Namibia. 

Bjørn á Heygum vil ikki gera samrøðu um málið, men sigur í viðmerking, at orsøkin til at hansara smápartafelag stendur á lønarseðlum í hesum málinum er, at felagið Tindhólmur av misgávum brúkti eina sokallaða klientkonto hjá Sp/F Bjørn á Heygum um hetta mundi, og tí er tað kortini Tindholmur, sum hevur rindað hesar hýrirnar, og ikki Bjørn á Heygum ella starvsfólk hansara.  Hann sigur seg ikki vita um, at ein klientkonta í hansara felagið er nýtt til at rinda hýrir hjá íslendskum sjómonnum í Namibia, fyrr enn Kringvarpið spurdi inn til hesar flytingar.