Einki skipað tilboð um sálarfrøðiliga hjálp

Tey, sum verða latin leys úr varðhaldi, fáa einki skipað tilboð um sálarfrøðiliga hjálp.

Heldur ikki føroyingar, sum sita í varðhaldi í Danmark, fáa skipað tilboð um hjálp frá sálarfrøðingi ella sálarlækna, tá teir verða latnir leysir.

Hetta sæst í svari frá løgmanni til Djóna Nolsøe Joensen, løgtingsmann.  

Hækkerup arbeiðir við uppskoti

Nick Hækkerup, løgmálaráðharri, hevur upplýst fyri landsstýrinum, at Løgmálaráðið er komið langt við einum uppskoti um eina lóg um, hvussu revsing skal avgreiðast í Føroyum.

Sambært uppskotinum verða somu reglur sum í Danmark galdandi um telefonsamrøður hjá teimum, sum eru í varðhaldi. 

Reglurnar í Danmark eru lagaligari enn í Føroyum. Tær eru eisini galdandi fyri føroyingar, sum eru í varðhaldi í Danmark.  

Í varðhaldinum í Mjørkadali sleppa tey, sum har eru fangar, at ringja tvær ferðir um vikuna, 10 til 15 minuttir hvørja ferð.

Kanna umstøðurnar

Í løtuni kanna føroysk og donsk embætisfólk, hvussu sleppast kann undan at senda føroyingar til Danmarkar at sita.

Tey skulu eisini gera frágreiðing um, hvussu umstøðurnar hjá teimum, sum sita í Føroyum, kunnu betrast.

Tá verður hugsað um høli, undirvísing, arbeiði og rúsevnisviðgerð.