Ógreitt hvør skipar landsstýri í Grønlandi

Ógreitt hvør skipar landsstýri í Grønlandi
Samráðingarnar eru lidnar, men ógreitt er, hvør verður í landsstýrissamgonguni, ella um IA skipar landsstýri einsamallur og hevur stuðulsflokkar
Mute B. Egede, formaður í IA, leggur samgonguskjalið fram seinnapartin
 
16.04.2021 - 15:27

Eftir øllum at døma eru landsstýrissamráðingarnar í Grønlandi lidnar, og seinnapartin fer Inuit Ataqatigiit at leggja samgonguskjalið fram.

Mute Egede, formaður í IA, fer at skriva undir samgonguskjalið við hin ella hinar floksformenninar í samgonguni, og síðani verða høvuðsøkini í samgonguskjalinum kunngjørd, skrivar Sermitsiaq.

Tað er óvist, hvør verður við í nýggju samgonguni, men Demokraatit og Siumut eru longu farnir burtur úr samráðingunum, so nýggja samgongan verður við Naleraq og kanska eisini Atassut.

Samgonga og stuðulsflokkar

Tað veldst, um Mute Egede og Inuit Atagatigiit vilja hava tepran meiriluta við sínum egnu 12 tinglimum og  fýra hjá Naleraq, ella um tey hava tikið tveir tinglimir aftrat við frá Atassut.

Ein annar møguleiki er, at IA skipar samgongu einsamallur, og hevur Naleraq og Atassut sum stuðulsflokkar, soleiðis sum gjørt var í undanfarna valskeiði, tá Demokraatit var stuðulsflokkur.

Mute Egede fer í dag eisini at kunngera, hvørji landsstýrisfólkini verða.

Nýggja tingsetan byrjar 23. apríl, og tá skal Landstingið góðkenna landsstýrisfólkini.

Er kopiera
Nýggjastu sendingar í ÚV
Sunnudag 22. november
Filosofiskur 9. partur
216718
Leygardag 21. november
Jambalaja - 211126
216767
Leygardag 21. november
Upp á tá - 201126
216763
Fríggjadag 20. november
Vikuskiftið 20 nov 2026
216752
Nýggjastu sendingar í SV
Fríggjadag 20. november
Dagur og vika - teknmálstulkað
216714
Fríggjadag 20. november
Veðrið
216748
Hósdag 19. november
Veðrið
216688
Hósdag 19. november
Silja millum strokini
216631
Mikudag 18. november
Dagur og vika - teknmálstulkað
216592