Lene Terp: Hepnið var ikki við okkum

Føroyar komu í bólk B saman við Spania, Skotlandi, Ukraina og Ungarn í HM-undankappingini. Tað er greitt eftir lutakastið í dag.

Landsliðsvenjarin, Lene Terp, er spent upp á uppgávuna, men heldur, at lutakastið kundi verið betri.

– Eitt lutakast snýr seg um hepni, og tað var ikki ordiliga við okkum í dag. Har vóru nógvir møguleikar í pottunum, sum vit á pappírinum høvdu verið javnari við, men tey londini fingu vit ikki í okkara bólk, sigur Lene Terp við heimasíðuna hjá Fótbóltssambandi Føroya.

– Mótstøðuliðini eru øll sera sterk, sjálvandi við Spania sum favoritti. Men hini londini eru eisini millum tey ovastu í hvørjum sínum styrkisbólkum, so vit hava nakrar truplar, men eisini gevandi dystir fyri framman, sigur Lene Terp, landsliðsvenjari.

Dystarskráin verður nú løgd, og fyrstu dystirnir í undankappingini verða spældir í september.