Burðardygt Arktis er avgerandi fyri Føroyar

- Eitt burðardygt Arktis er alt avgerandi fyri Føroyar.

Tað segði Bárður á Steig Nielsen, løgmaður, tá hann hevði orðið á fundi í arktiska ráðnum í Reykjavík fyrrapartin.

Hann segði, at føroyska havøkið er nærum 200 ferðir so stórt sum landaøkið, og vit eru søguliga ávirkað av og bundin av havinum, eisini arktiska havinum.

- Tí eru vit tilvitað um veðurlagsvandan og møguligar avleiðingar av honum, segði løgmaður.

Hitti Blinken og Lavrov

Áðrenn fundurin í arktiska ráðnum varð settur, hitti Bárður á Steig Nielsen amerikanska uttanríkisráðharran, Antony Blinken, og russiska uttanríkisráðharran, Sergej Lavrov.

Og seinnapartin hittir løgmaður íslendska uttanríkisráðharran, Guðlaug Þór Þórarson.

Íslendski formansskapurin í arktiska ráðnum endar í dag. Russland fær formansskapin næstu tvey árini. 

Bárður Steig Nielsen og Sergej Lavrov

Løgmaður hitti eisini russiska uttanríkisráðharran, Sergej Lavrov, í Reykjavík.