Roynir at sleppa undan misáliti

Svenski forsætisráðharrin, Stefan Löfven, roynir nú í evstu løtu at sleppa undan misáliti á stjórnina.

Politisk ósemja um leigukostnaðin fyri leigubústaðir hevur elvt til stjórnarkreppu í Svøríki.

Stefan Löfven skjýtur nú upp, allir partar á íbúðarmarknaðinum skulu fáa freist til 1. september at finna eina loysn á stríðnum. Avtalan skal síðani leggjast fyri ríkisdagin. 

Men Vinstriflokkurin, sum vanliga tekur undir við stjórnini, er ikki nøgdur við uppskotið hjá forsætisráðharranum.

Politiskur sjónleikur

- Eingin álvari er í hesum uppskotinum, sum er ein politiskur sjónleikur til tess at seinka tilgongdini, sigur forkvinnan í Vinstraflokkinum, Nooshi Dadgostar.

Meiriluti er í ríkisdegnum fyri einum misáliti á stjórnina hjá Stefen Löfven. 

Bæði Vinstriflokkurin og Svøríkisdemokratarnir hava boðað frá, at teir fara at atkvøðu fyri uppskotinum um misálit í ríkisdegnum í morgin. 

Sosialdemokatarnir og Tey grønu manna svensku stjórnina, sum fær stuðul frá Miðflokkinum og Liberala flokkinum.