Útróðurin í Grønlandi fær fíggjarliga hjálp

Útróðrarmenninir í Grønlandi, sum fiska tosk, fáa nú eina hjálpandi hond.

Fíggjar- og skattanevndin í landstinginum hevur góðkent ein hjálparpakka upp á níggju milliónir kr., skriva grønlendskir miðlar.

Uppskotið kom úr landsstýrinum, sum saman við fíggjar- og skattanevndini hevur gjørt lógarpakkan.

Landsstýrið skeyt upp, at útróðrarmenninir skulu fáa ein serligan stuðul til avreiðingarprísin. Hann skal vera millum fimm og 25 prosent av avreiðingarprísinum í fjør.

- Útróðrarmaðurin kann i mesta lagi fáa eitt endurgjald, sum svarar til 20 prosent av prísinum, áðrenn avreiðingarprisurin lækkaði. Hjálparpakkin er galdandi frá 1. januar til nýggjárs, stóð í uppskotinum.

Í januar vísti grønlendska fiski- og veiðimannafelagið, KNAPK, á, at toskaprísurin er fallin, og tí hevur útróðrarvinnan tørv á fíggjarligari hjálp.