Taliban vil ikki leingja evstamarkið

Taliban tekur ikki undir við at leingja evstamarkið hjá vesturlendskum herdeildum at fara úr Afganistan til eftir 31. august.

Tað siga tvær keldur í hernaðarliga islamistbólkinum við Reuters-tíðindastovuna í morgun.

Keldurnar siga, at higartil hevur eingin stjórn í vesturheiminum, og heldur ikki embætisfólk, sett seg í samband við Taliban um at leingja freistina.

Leggja trýst á Taliban

Samstundis skrivar The Guardian, at Bretland fer at leggja trýst á Taliban um at flyta evstamarkið, umframt at tað eisini fer at heita á USA um at bíða við afturtøkuni úr høvuðsstaðnum, Kabul, til eftir videofundin hjá G7-londunum, sum verður í morgin. 

Samband hevur verið millum Bretland og USA um at leingja afturtøkuna frá flogvøllinum í Kabul, og á G7-fundinum í morgin fer Bretland at leggja trýst á amerikanska forsetan, Joe Biden, um at bíða við afturtøkuni.

Ger Biden ikki tað, kunnu onnur lond ikki gera annað enn at gevast við arbeiðnum at fáa fólk úr Afganistan, sigur bretski verjumálaráðharrin, James Heappey, við Sky News.