G20 toppfundur í Rom

Í dag og í morgin hittast leiðarar úr G20 londunum í Rom í Italia fyri at kjakast um veðurlagsbroytingar, orkukreppuna og støðuna við koronufarsóttini.

Tað skrivar BBC.

Hetta er fyrstu ferð, at G20-leiðarar hittast síðan koronufarsóttin fór at gera um seg.

Men forsætisráðharrin í Kina, Xi Jinping, og Vladimir Putin, forseti í Russlandi, vera ikki sjálvir til staðar á  toppfundinum í Rom - teir hava báðir valt at vera við á sjónbandi. 

Toppfundurin verður hildin um somu tíð, sum langtíðarútlitini fyri veðurlagið síggja út til at versna, og bráneyðugt er at seta tiltøk í verk at minka um útlátið.

G20 londini, sum eru 19 av størstu londunum í heiminum, og ES, eru mett at hava ábyrgdina fyri 80% av øllum útláti.

Sambært Reuters eru ætlanir um, at G20 londini skulu gera avtalu um, at arbeiða fyri at avmarka, hvussu nógv hitin fer at vaksa. Sum nú er sær út til, at hitin fer at vaksa við 1,5 stigum um allan heim. Men talan verður tó ikki um nakran løgligan sáttmála.