Bjørt spyr um hvítvask og fíggjarlig brotsverk

Bjørt Samuelsen, tingkvinna fyri Tjóðveldi, vil nú vita, um ætlanin er at kanna vavið á hvítvaski ella øðrum fíggjarligum kriminaliteti í Føroyum.

Hon hevur sett Magnusi Rasmussen, landsstýrismanni í vinnumálum, ein fyrispurning.

Í dátulekanum Congo Hold-Up er komið fram, at felagið All Oceans Logistics hevur eftir øllum at døma hvítvaskað pengar í BankNordik.

Í hesum føri vóru tað pengar, sum upprunaliga vóru rændir úr ríkiskassanum í Kongo.

Virka undir danskari lóggávu

Føroysku peningastovnarnir virka undir danskari lóggávu og eftir somu krøvum og fráboðanarskyldum um hvítvask sum danskir bankar.

Bjørt Samuelsen vil millum annað vita, um føroyskir myndugleikar fáa yvirlit yvir, hvørjar fyritøkur ella persónar, sum eru skrásett ella búgva í Føroyum, eru partar av hvítvasking av pengum ella øðrum fíggjarligum kriminaliteti.

BankNordik vil ikki viðmerkja tað, sum er komið fram í dátulekanum.

Bankin hevur kortini boðað frá, at 176 mál um illgrunasom peningamynstur vóru fráboðaði SØIK, bakmanspolitinum, í fjør.