Noreg útflutt fiskavørur fyri 96 mia. kr. í ár

Tað gongur væl við norska útflutninginum av fiski.

Í oktober var útflutningurin 11,2 milliardir kr., og hann er væl størri enn í fjør.

Útflutningurin av fiskavørum er higartil í ár 95,9 milliardir kr., upplýsir norska útflutningsráðið.

Fleiri lond keypa norskar fiskavørur, tey eru 115, næstan 20 fleiri enn fyri 10 árum síðani.

Londini, sum keypa mest úr Noregi, eru Pólland, Danmark, Frakland, Holland og USA.

Meginparturin laksur 

66 prosent av útflutninginum í oktober var laksur. Nøgdin minkaði eitt sindur, men virðið vaks 14 prosent.

Útflutningurin av sild var tann besti í 10 ár, 50.000 tons, fyri 661 milliónir kr.

Londini, sum keypa mest av sild, eru Egyptaland, Týskland og Pólland

Norski fiskimálaráðharrin, Bjørnar Skjæran, sigur, at ætlanin er at vaksa um norska útflutningin av øðrum enn olju og gassi við eini helvt fyri 2030, og har er fiskur ein góður møguleiki, sigur hann.