Ætlanin um stórhøll á Strondum slept

Bólkurin, sum arbeiddi fyri stórhøll á Strondum, er givin.

Og umsóknin um stuðul, sum var send løgtinginum, er tikin aftur.

Orsøkin er, sigur bólkurin, at stuðul er játtaður til stórhøll í Hoyvík. 

Tórshavnar kommuna og fólkatingið hava játtað 140 mió. kr. til verkætlanina í Hoyvík.

Endamálið rokkið

Høvuðsendamálið hjá bólkinum var at fáa eina stórhøll í Føroyum. Við høllini í Hoyvík er endamálið rokkið, sigur bólkurin.

Sambært bólkinum fór høllin á Strondum at kosta 120 mió.kr. Landið fekk umsókn um 84 mió. kr., 70 prosent.

Sjóvar kommuna segði seg vilja stuðla høllini við 30 prosentum av 120 mió.kr.

Og grundøki var ávíst. Ætlanin var, at ein sjálvsognarstovnur skuldi byggja stórhøllina, sum skuldi verða liðug fyrst í 2024.