Greenland Minerals gevst

Greenland Minerals gevst nú við sínum virksemi í Grønlandi.

Greenland Minerals hevur arbeitt við eini størri námsætlan í Kuannersuit í Suðurgrønlandi síðani 2007, við tí fyri eyga at útvinna eitt nú uran og onnur sjáldsom jarðarsløg.

Greenland Minerals er eitt avstralskt námsvinnufelag.

Landstingið ímóti

Felagið gevst nú við grønlendska virkseminum, eftir at ein tepur meiriluti í landstinginum fyri einum mánaði síðan samtykti at avmarka leiting og útvinning av urani í Grønlandi. 

Markið er 100 gramm pr. tons av málmi, men Greenland Minerals metir, at í Kuannersuit fjallinum eru um 300 gramm av urani pr. tons av málmi.

Námsvinna var eitt av stóru evnunum til landstingsvalið í Grønlandi fyrr í ár, og IA, sum vann valið, var hart ímóti at loyva námsvinnu.

Hóast virksemið heldur uppat, sigur Greenland Minerals, at tey framhaldandi fara at hava samband við landsstýrið,um støðan broytist.