Óvist nær triðja viðgerð verður

Enn er óvist, nær uppskotini um sammóður koma til triðju viðgerð. 

Tað sigur Jógvan á Lakjuni, løgtingsformaður.

Sambært tingskipanini skulu ganga minst tveir dagar millum aðru og triðju viðgerð, og tí kann triðja viðgerð í fyrsta lagi vera í morgin. Enn er eingin tingfundur lýstur at vera í morgin. 

Tingformaðurin sigur, at triðja viðgerðin av málunum um sammóður hevur eisini samband við onnur mál, sum skulu viðgerast í tinginum, eitt nú fíggjarlógina, sum væntandi kemur úr fíggjarnevndini í dag.

Arbeiða við loysn

Uppskotini um sammóður, sum tingfólk i andstøðuni løgdu fram, vóru samtykt við aðru viðgerð í gjár. 

Samgongufólkini, Johan Dahl og Annika Olsen, atkvøddu fyri uppskotunum, sum vóru samtykt við 17 atkvøðum fyri og 16 ímóti. 

Síðani hevur løgmaður sagt, at samgongan arbeiðir við einari loysn, sum alt tingið kann taka undir við, tá málini koma til triðju viðgerð.