"Abbi og eg og abbi" í uppskoti at fáa mentavirðisløn

Barnabókin "Abbi og eg og abbi" eftir Dánial Hoydal og Anniku Øyrabø, er føroyska uppskotið til barna- og ungdómsbókmentavirðisløn útnorðurráðsins.

Føroyar, Grønland og Ísland innstilla hvør sína barna- og ungdómsbók.

Grønland hevur innstillað bókina við heitinum "Djóranna fundur" um dálkingina av jørðini, sum Kent Kielsen hevur skrivað, og Ísland bókina "Bannað at oyðileggja" eftir Gunnar Helgason.

Útnorðurráðið sigur í tíðindaskrivi, at allar tríggjar bøkurnar viðgera torfør og álvarsom evni í barnahædd, og á ein positivan hátt.

Abbin broytist

Bókin hjá Dániali Hoydal og Anniku Øyrabø, "Abbi og eg og abbi," snýr seg um at hava ein abba, sum broytist, og er farin at gloyma, og hvussu tað kann vera hjá einum barni at skilja hetta.

Útnorðurráðið letur barna- og ungdómsbókmentavirðislønina annaðhvørt ár, og endamálið er at styrkja barna- og ungdómsbókmentirnar.

Umframt heiðurin, fáa vinnararnir av bókmentavirðislønini eisini 60.000 krónur.

Vinnarin av barna- og ungdómsbókmentaheiðursløn útnorðurráðsins verður almannakunngjørdur í heyst.

Abbi og eg og abbi