Skulu reisa seg ímóti Eysturríki

Álopsspælið skal sita, og spælararnir skulu vera skjótir aftur í verjuna at standa, tá føroyska hondbóltslandsliðið við kvinnum tekur ímóti Eysturríki í Havn mikudagin.

Tað sigur Sonni Larsen, venjari. 

Málverjin, Annika Fríðheim Petersen, sum fyri kortum skifti Ísland út við Nykøbing F. Håndbold í bestu donsku deildini, heldur, at tað hevur týdning at reisa seg eftir laka avrikið ímóti dønum í heyst.

 - At kunna taka ímóti Eysturríki og skula vísa, hvat vit í roynd og veru duga, er ræðuliga týdningarmikið, sigur hon.

Hon heldur ikki, at tað er ógjørligt, at fáa eitt gott úrslit ímóti Eysturríki, sum millum annað hevur dugnaliga bakspælaran, Sonju Frey úr Herning-Ikast, á liðnum.

 - Vit hava frálíkar spælarar, sum allar kempa og vilja tað sama, og tað hevur størstan týdning. Um vit fáa hildið leikferðina hjá okkum og spælt okkara spæl, so verður tað heilt avgjørt ein spennandi dystur, sigur Annika Fríðheim Petersen.