Fuglfirðingar fáa nýggjan borgarstjóra

Sonni á Horni verður borgarstjóri í Fuglafirði næstu fýra árini. Listin hjá honum - listi D - fekk reinan meiriluta á kommunuvalinum mikudagin, men enn er ógreitt, um hann fer at stýra kommununi einsamallur.

 

- Vit hava havt fundir við hinar báðar listarnar, og skulu hittast aftur í dag, men enn er einki avgjørt, sigur Sonni á Horni. Hann fekk 102 persónligar atkvøður á valinum - 16 fleiri enn borgarstjórin í Fuglafirði seinastu 12 árini, Sigurð Simonsen. 

 

Hinir báðir listarnir í Fuglafirði - listi A og listi B - fingu tveir býráðslimir í part. Sonni á Horni sigur, at semja er um, at hann verður borgarstjóri í kommununi komandi fýra árini. Hann væntar, at nýggja býráðið í Fuglafirði verður skipað í morgin.