Fogh: Vit hava verið ov góðvarin

Fyrrverandi NATO-aðalskrivarin Anders Fogh Rasmussen heldur, at vesturheimurin hevur verið alt ov góðvarin, tí Vladimir Putin hevur verið ein hóttan í mong ár.

Tað sigur hann í samrøðu við Berlingske í dag.

Anders Fogh Rasmussen vísir á, at um vit høvdu sæð vandatekinini áðrenn, hevði støðan í dag verið øðrvísi.

- Vit mugu øll ásanna, at vit hava verið ov góðvarin, og at vit hava feilmett hansara ætlanir og harðskap. Vit hava trúð alt ov nógv uppá, at okkara liberalu virðir av sær sjálvum fóru at vinna, sigur hann við Berlingske.

Fyrrverandi NATO-aðalskrivarin samanber Putin við einaræðisharrar sum Adolf Hitler og Josef Stalin og grundar hetta við, at Putin stýrir einum landi, sum er í afturgongd.

Hann vísir á, at Russland er ov bundið av orkuútflutningi og ikki hevur framt neyðugar búskaparligar broytingar, og at Putin tí nú er desperatur og vandamikil. Og so hevur tað eisini nógv at siga, at Putin hevur kjarnorkuvápn.

Anders Fogh Rasmussen var NATO-aðalskrivari árini frá 2009 til 2014. Áðrenn tað var hann millum annað danskur forsætisráðharri frá 2001 til 2009.