Útfylling í Árnafirði góðkend

Umhvørvisstovan hevur givið góðkenning til útfylling á sjógv í Árnafirði

Umhvørvisgóðkenningin fevnir um ætlanina hjá Klaksvíkar kommunu at útbyggja bátahylin í Árnafirði.

Fylt verður afturat uttara garði á bátahylinum út á 14 metra dýpi, umframt at garðurin verður longdur einar 80 metrar vestureftir.

Tvørgarðurin við innsiglingina gongur úr fylluni fyri vegnum í fjøruni, og út á sjey metra dýpi, har hann umskarast við fylluna frá tí uttara garðinum.

Tunlar norður um Fjall, Árnafjørður - Mynd: Pól Sundskarð

30.000 rúmmetrar av gróti

Nýttir verða umleið 30.000 rúmmetrar av tunnilsgróti frá nýggju tunlunum norður um Fjall.

Grótið verður koyrt út við lastbili og flótisperra verður løgd beint út frá landi. 

Ein búlendislýsing av økinum var gjørd av Biofar. Niðurstøðan var at av búlendum og staðfestum sløgum vórðu eingin mett at vera sjáldsom í Føroyum.

Avgerðin kann kærast til landsstýrismannin í umhvørvismálum. 

Kærufreistin er 17. mai 2022.

Kærurætt hava tey, sum avgerðin hevur ein serstakan, beinleiðis og persónliga týdning fyri. 

Árnafjørður - Mynd: Pól Sundskarð