Kunnu taka havhestaegg hóast fuglakrím

Til ber at fara eftir havhestaeggum, hóast fuglakrím er í Føroyum.

Men ansast má væl eftir.

Heilsufrøðiliga starvsstovan er spurd, um vandi er fyri smittu við fuglakrími, tá havhestaegg vera tikin.

Svarið er, at umráðandi er at vaska sær væl um hendurnar, tá rá egg verða handfarin. Egg skulu ikki takast, um sjúkur ella deyður fuglur er í økinum.

Smittar vanliga ikki fólk

Eggini skulu hitaviðgerast væl, áðrenn tey vera etin. Rá egg skulu ikki koma í samband við mat, sum er klárur at eta.

Tað slagið av fuglakrími, sum er á okkara leiðum, smittar vanliga ikki fólk. 

Okkurt dømi er tó, men tá hava fólk verið í serliga tøttum sambandi við sjúkan fugl uttan at hugsa um smittuvandan, sigur Heilsufrøðiliga starvsstovan.