Keyptu brúkt klæði fyri 2.900 kr. um dagin

Fólk eru farin at keypa og brúka nógv fleiri brúkt klæði.

Í hvussu so er seldi endurnýtsluhandilin hjá Reyða krossi í Stiðjagøtu í Havn fyri næstan 2.900 kr. um dagin í fjør.

Sølan setti met í fjør. Selt var fyri eina millión og góðar 239.000 kr.

Í 2020 var selt fyri 866.000 kr. og í 2019 fyri 974.000 kr. 

Barnaklæðir áttu 27 prosent av søluni í fjør.

Eisini størri søla á Bryggjubakka

Handilin á Bryggjubakka hevur selt fyri munandi meira í fjør, tá hann seldi fyri 138.000 kr. Í 2020 var sølan 85.000 kr.

Korona gjørdi, at sølan ikki bleiv so stór í 2020 og í fjør.

Bókasølan seldi fyri góðar 160.000 kr. í fjør, sum er nakað meira enn í 2020.

Og endurnýtsluhandilin í Vági seldi fyri 127.500 kr. í fjør, sum er væl meira enn onnur ár.   

Jóannes heldur fram

Jóannes Eidesgaard heldur fram sum formaður í Reyða krossi eftir aðalfundin, sum var í gjár.

Torfinn Højgaard er næstformaður, og Mary-Ann Thomsen er kassameistari.

Hinar í nevndini eru Kristianna Winther Poulsen og Súsanna Thomsen.

Bæði Jóannes Eidesgaard og Torfinn Højgaard stóðu fyri vali á aðalfundinum og vóru afturvaldir.

Jóannes Eidesgaard

Jóannes Eidesgaard heldur fram sum formaður í Reyða Krossi Føroya.