Fyrrverandi uppreistrarmaður nýggjur forseti í Kolumbia

Fyrrverandi uppreistrarhermaðurin, Gustavo Petro, er valdur til forseta í Kolumbia. Tað vísti úrslitið, tá 90 prosent av atkvøðunum vóru taldar, skrivar Reuters.

Hann stillaði upp fyri vinstraveingin í Kolumbia.

Síðani Kolumbia loysti frá Spania fyri 200 árum síðani, hevur landið bert havt liberalar ella konservativar forsetar. Men nú hevur Kolumbia fingið ein forseta, sum er uttarlaga á vinstraveinginum.

Petro hevur boðað frá, at hann fer at virka fyri einum Kolumbia, har virðini verða býtt javnari millum fólk.

- Tað er ein sera lítil partur av fólkinum, sum hevur átt øll virði. Tað skal broytast nú, so øll fáa lut í teimum, sigur nývaldi forsetin.

Atkvøður frá teimum ungu

Forsetin lovar eisini at leggja størri dent á veðurlagsviðurskiftini í landinum, og tað hevur eftir øllum at døma fingið tey ungu at velja hann.

77 ára gamli Rodolfo Hernandes, sum var mótvalevni fyri høgraveingin, hevur viðgingið tapið, og hann sigur seg vóna, at Gustavo Petro fer at megna at leiða Kolumbia fram á leið.

Gustavo Petros, sum er 62 ára gamal, er fyrrverandi uppreistrarhermaður. Han stríddist ímóti stjórnini í bólkinum M-19 miðskeiðis í 70unum.

Hann var tikin vápnaður í 80unum, og var dømdur at sita í 18 mánaðir.

Gustavo Petro verður eftir ætlan tikin í eið sum forseti 7. august.

- Vit gleða okkum til at samstarva við nýggja forsetan í Kolumbia, sigur amerikanski uttanríkisráðharrin, Antony Blinken, í eini viðmerking til forsetavalið í Kolumbia.