Russisk skip sleppa ikki í føroyskar havnir

Kunngerðin um revsitiltøk móti Russlandi er ikki lýst enn, men sambært uppskotinum sleppa russisk skip ikki í føroyskar havnir eftir 24. juni, sum er í morgin.

Fiskiskip eru tó undantikin.

Í uppskotinum stendur, at eftir 24. juni er bannað at veita atgongd til havnir í Føroyum fyri skip, sum eru skrásett undir russiskum flaggi.

Ásetingin er tó ikki galdandi fyri skip, sum hava brúk fyri hjálp og leita í neyðhavn, ella av neyð noyðast at leggja inn í føroyska havn fyri at halda trygdina á sjónum, ella fyri at bjarga lívi á sjónum. 

Kunngerðin er ikki lýst enn og tí heldur ikki komin í gildi.

Sambært uppskotinum skal kunngerðin koma í gildi dagin eftir, at hon er kunngjørd.