300 fólk arbeiða eftir fast-track-skipanini

300 fólk hava fingið arbeiði í Føroyum eftir fast-track-skipanini, sum kom í gildi 18.november í fjør.

Meira enn 90 arbeiðsgevarar eru undangóðkendir hjá Útlendingastovuni at brúka skipanina.

Føroyar og Danmark gjørdu í fjør heyst avtalu um skipanina, sum er fyri fólk uttan fyri ES.

Markið er 3,5 prosent

Fast-track skipanin fer úr gildi, um arbeiðsloysið í Føroyum fer upp um 3,5 prosent.

Arbeiðsgevarar, sum vera undangóðkendir, skulu vátta, at útlendska arbeiðsmegin fær setanarbræv sambært føroyskari lóg, at lønin er sambært føroyskum sáttmála, og at arbeiðsumstøðurnar annars eru tær somu sum hjá føroyingum.

Fast-track-skipanin gevur føroyskum vinnulívi betri atgongd til útlendska arbeiðsmegi, styttir viðgerðartíðina og lættir munandi um umsitingina av arbeiðsloyvum.