Heimafriður: Løgmaður segði einki um ljóðdálking

- Nærum hvønn einasta dag, kvøld og nætur við, verða nógv fólk plágað og pínd av larmi, og harumframt er dálking av royki frá skipunum eisini ein stórur trupulleiki.

Tað sigur felagið Heimafriður, ið ilskast inná, at løgmaður í ólavsøkurøðu síni ikki segði eitt orð um ljóðdálking.

- Sama dag, sum landstýrismaðurin í fiskivinnumálum í tíðindunum segði seg vilja fara til samráðingar um nýggjan fiskiveiðisáttmála við Russland, flýddu fólk úr sínum egnu heimum undan hesum larmandi skipum, ið núverandi fiskiveiðisáttmáli gevur undantaksloyvi til at umskipa við føroyskan bryggjukant, sigur Heimafriður.

Felagið spyr tí Bárð á Steig Nielsen, løgmann, hvat hann ætlar at gera fyri at skapa lívd hjá teimum, sum hvønn dag líða undir larmi frá skipum.