Avbjóðingar eru við trygdini á alibátum

Sjóvinnustýrið hevur gjørt eina kanning av føroyska flotanum av alibátum

Úrslitið vísir, at ávísar avbjóðingar eru við trygdini á alibátunum. Serliga er tað tættleiki á skrokkum, brandútgerð og spuli- og lendipumpur, sum ikki lúka krøvini.

Orsøkin til, at Sjóvinnustýrið ger hesar kanningarnar, er hendingin 8. apríl 2021, tá alibáturin Krosssteinur sakk hálvan fjórðing úr Porkerisnesi. 

Tveir mans vóru við, og báðir vóru bjargaðir upp í annan bát.

28 bátar við í kanningini

28 alibátar vóru við í kanningini, og tað svarar til 34 prosent øllum alibátum í Føroyum. 

Bjargingarútgerð, eldsløkkiskipanir og ávaringarskipanir eru í lagi í allar flestu bátunum.

Fyri at røkka málinum um, at allir alibátar lúka øll krøv, hevur Sjóvinnustýrið sett eina skiftistíð fyri eigarar og manning um at fáa øll viðurskifti í rættlag sum skjótast.