Bjargingarvestur blásti seg sjálvan upp, og sendi neyðsignal

Í gjáramorgunin fekk MRCC eitt sokallað AIS MOB-neyðsignal, ið merkir “maður fyri borð”.

Skjótt stóð greitt, at neyðsignalið kom frá Skálatrøð, har bátabrúgvar og hópin av bátum eru.

Fólk frá bæði MRCC, politinum og Rescue Lív fóru á staðið at leita, men tíbetur kundi skjótt staðfestast, at neyðsignalið kom frá einum báti, sum lá við bátabrúgvarnar, og at eingin skaði var.

Tað vísti seg, at umborð á bátinum var ein bjargingarvestur, ið hevði blást seg sjálvan upp og samstundis var farin at senda neyðsignal yvir fylgisvein.

Eigarin fekk fráboðan um hetta og bjargingararbeiðið kundi avblásast í øllum góðum.