Sambandsflokkurin og Javnaðarflokkurin varðveita sessirnar

Sambandsflokkurin og Javnaðarflokkurin høvdu varðveitt fólkatingssessirnar, um val var í dag. 

Tað vísir kanning, sum spyr.fo hevur gjørt fyri Portalin. 

Sambandsflokkurin er størsti flokkur í kanningini. Hann fær 29,9 prosent av atkvøðunum. Tað er ein framgongd upp á 1,5 prosentstig samanborið við seinasta fólkatingsval.

Fólkatingsvalið 2022, Sambandsflokkurin

Bárður á Steig Nielsen, formaður í Sambandsflokkinum.

Framgongdin er uppaftur størri, tá samanborið verður við seinastu kanningina hjá spyr.fo, sum bleiv gjørd fyri Kringvarpið í september. Tá fekk flokkurin 23,7 prosent, sum eru 6,2 prosentstig minni enn í nýggju kanningini. 

Næststørsti flokkur er Javnaðarflokkurin, sum fær 27,3 prosent av atkvøðunum. Tað eru 1,7 prosentstig meira enn á seinasta vali. Samanborið við seinastu kanning er talan tó um eina afturgongd upp á 6,4 prosentstig.

Fólkatingsvalið 2022, Javnaðarflokkurin

Aksel V. Johannesen, formaður í Javnaðarflokkinum. (Mynd: Bjarni Árting Rubeksen)

Tjóðveldi og Fólkaflokkurin

Nógv skal broytast seinastu dagarnar av valstríðnum, um hinir flokkarnir skulu vinna annan sessin. Tjóðveldi fær 18,7 prosent av atkvøðunum, meðan Fólkaflokkurin fær 16,7 prosent. Sostatt liggja teir báðir flokkarnir ávikavist umleið 8,6 og 10,6 prosent aftan fyri Javnaðarflokkin. 

Miðflokkurin, sum ikki stillaði upp seinast, fær 4,3 prosent, og Framsókn fær 3,2 prosent, sum er 0,7 prosentstig meira enn á seinasta vali.  

11,6 prosent av teimum spurdu siga, at tey fara ikki á val, 10,2 prosent hava ikki tikið støðu, og 0,4 prosent fara at atkvøða blankt. Vallutøkan á seinasta vali var 70 prosent. 

500 fólk vóru spurd í kanningini, sum var gjørd í gjár.