Landið kann vænta sær nógv meira fyri partapeningin

Landið kann fáa nógv meira fyri síni partabrøv í Tjaldri, enn tað hevur sett í fíggjarlógina.

Í fíggjarlógini eru sjey milliónir krónur.

Men grannskoðanarvirkið Januar, sum stendur fyri søluni, metir, at ognarparturin hjá landsstýrinum er verdur 18,2 til 23,1 mió.kr.

Januar heldur, at P/f Tjaldur er 650 til 825 milliónir vert. Landið eigur 2,8 prosent í Tjaldri.

Januar ger vart við, at felagið hevur bara havt atgongd til almennar upplýsingar um P/f Tjaldur.  Januar hevur ikki havt atgongd til innanhýsis upplýsingar hjá Tjaldri.

Freistin er 28. november

Januar kunngjørdi í gjár, at landins partabrøv í Tjaldri eru til sølu. 

Sambært tíðarætlanini er ætlanin at avgreiða søluna fyri árslok. 

Freistin at koma við tilboði er 28.november.

9.desember er ætlanin at selja.