Lesandi skulu rinda eftirløn

Løgtingið samtykti í vár nýggja lóg um eftirløn, sum áleggur øllum borgarum millum 21 ár og fólkapensjónsaldur at spara saman til egna eftirløn.

Eitt prosent

Í lógini er ásett, at eftir 1. januar skal í minsta lagi 1 prosent av inntøkuni rindast til eftirløn. Tað merkir, at fær ein lesandi 5.000 krónur í løn aftrat lestrarstudninginum, skal hann rinda 50 krónur til egna eftirløn.

Eftirlønargjaldið hækkar á hvørjum ári eitt prosentstig - upp í 15 prosent í ár 2028 og seinni.

Lesandi uttanlands, sum hava varðveitt fulla skattskuldu í Føroyum, hava ikki skyldu at spara saman til egna eftirløn av pengum, sum tey tjena uttanlands. Men lesandi uttanlands, sum tjena pengar í Føroyum, skulu rinda eftirløn. Kravda eftirlønargjaldið er galdandi fyri lesandi, sum í 2014 fylla 21 ár og tey, ið eru eldri enn 21.

Og TAKS leggur aftrat, at lesandi undir 21 ár eru eisini væl komin at rinda til eftirløn, men tey SKULU ikki.