Søkja eftir stjóra til Vestmanna skúla

Uttanríkis- og Mentamálaráðið søkir nú eftir skúlastjóra til Vestmanna skúla at byrja 1.februar næsta ár ella so skjótt sum til ber.

Í Vestmanna Skúla eru 171 næmingar í 1. til 10.flokk. Skúlin hevur eisini serflokk.

Í skúlanum eru 21 lærarar og tveir námsfrøðiligir stuðlar. 

Freistin at søkja starvið sum skúlastjóri í Vestmanna er til 14.desember.

Rok um skúlastjóran

Nógv rok var í Vestmanna skúla, tá skúlaárið byrjaði í august, og tað endaði við, at Alis Jóna Højsted, fór frá sum skúlastjóri.

Hon er nú virkandi skúlaleiðari í Viðareiðis skúla.

Undirvísingarstýrið tilnevndi í august fyrrverandi skúlastjóran á Eysturskúlanum í Havn, Eyðdis Eidesgaard, sum fyribils skúlastjóra í Vestmanna.