Póllendingur druknaði við vestaru bryggju

Maðurin, sum varð funnin deyður inni við vestaru bryggju í Havn í gjár, var póllendingur. 

Maðurin sigldi við ísfiskatrolaranum Ametyst, sum liggur við bryggju í Havn. 

Maðurin var saman við einum vinmanni farin í býin í Havn leygarkvøldið. 

Stutt fyri midnátt fór hann einsamallur úr býnum, og fór til skipið.

Vinmaðurin kom heim tíðliga gjáramorgunin, men tá var eingin maður í koyggjuni.

Líkið funnið nærindis skipinum

Løgreglan var boðsend og setti kanning í verk. Millum annað vísti fartelefonin hjá manninum, at seinasta signalið var frá eini mastur á kaiini.

Boð vóru tí send eftir froskmanni hjá Tórshavnar sløkkiliði, og hann fann líkið av manninum á botni nærindis Ametyst.

Vaktleiðarin á løgreglustøðini, Jóannes Østerø, sigur, at eingi tekin eru um nakað brotsverk.

Maðurin var fyrst í 40'unum og hevði konu og trý børn í Póllandi. Avvarðandi hava fingið deyðsboðini.

Maðurin var vanlukkutryggjaður í Føroyum.