Kári noyðist helst at rinda eina millión

Nógv bendir á, at Kári P. Højgaard, landsstýrismaður, noyðist at flyta P/f Eysturoyartunlinum eina millión krónur sunnudagin.

Rættarnevndin er ikki liðug við tunnilsmálini enn. Nevndin hevði fund í gjár, men næsti fundur hjá nevndini er ikki ásettur. Hann verður møguliga í hesari vikuni, sigur Elsebeth Mercedis Gunnleygsdóttir, forkvinna í Rættarnevndini.

Ymisk viðurskifti kannast

Hon sigur, at álitið hjá nevndini er ikki liðugt. Ymisk viðurskifti eru at kanna, og nevndarlimir skulu eisini tosa við sínar flokkar um tey fimm lógaruppskotini um tunlar, sum nevndin hevur havt til viðgerðar síðani 6.august.

Elsebeth Mercedis Gunnleygsdóttir vil ikki siga so nógv um nevndararbeiðið. Í gjár fekk nevndin nøkur skjøl í trúnaði frá Innlendismálaráðnum, men tað var kortini ikki sáttmálin, sum ráðið og Copenhagen Infrastructure Partners hava gjørt.

Tingið ger lógina

Talan er um viðmerkingar til málið, sigur forkvinnan í Rættarnevndini. Hon endurtekur, at løgtingið ger lógina, og landsstýrismaðurin eigur sáttmálan. Lógaruppskotið hjá Kára P. Højgaard um privatan Eysturoyartunnil byggir á sáttmálan um tunnilin.

Spurd, um Rættarnevndin fer at koma við broytingaruppskotum, sum gera, at landsstýrismaðurin noyðist at fáa sáttmálan broyttan, hevur Elsebeth Mercedis Gunnleygsdóttir onga viðmerking.

Bíða eftir Rættarnevndini

Eingin løgtingsfundur er fráboðaður í hesari vikuni. Bíðað verður eftir álitinum frá Rættarnevndini, so onnur viðgerð kann vera. Landsstýrismaðurin hevur sagt, at hann ætlar at skriva undir sáttmálan um Eysturoyartunnilin fyri 1.september, sum er sunnudagin.

Tað er komið undan kavi, at verður tað ikki gjørt, skal P/f Eysturoyartunnilin hava eina millión krónur úr landskassanum.