Gentuvesið fær Ársins miðlaheiðursløn

LGBT+ Føroyar læt í gjárkvøldið Ársins miðlaheiðusløn. 

Um virðislønina sigur LGBT+ Føroyar millum annað, at hon verður latin til fólk, feløg, stovnar ella miðlar, sum varpa jaligt ljós á LGBT+ fólk í Føroyum.

“Tit seta lit á Kringvarpið. Tað lýsir av tykkum og hoyrist so væl, at tit brenna fyri tí, tit gera. Tit gera stóran mun, tí loyvt er at spyrja um alt og loyvt er at tosa um alt. Júst tað er so týdningarmikið”, ljóðaði tað millum annað í grundgevingunum hjá LGBT+ Føroyar fyri at lata Gentuvesinum virðislønina.

Eisini sigur LGBT+ Føroyar, at gestirnir, sum Rannvør Fríðu Eyðunsdóttir og Annika Dalsgaard velja til sínar sendingar, kenna seg bæði hoyrd og sædd í sendingunum, sum bæði rúma opinleika, fjølbroytni og ymiskleika.

gentuvesið, Ársins miðlaheiðursløn

Gentuvesið er ungdómssending hjá ungdómspallinum Biit í Kringvarpi Føroya. Í sendingini verður prátað um alt millum himmal og jørð, og hvørja viku eru nýggir gestavertir við.

Gentuvesið verður eisini send í útvarpinum, og sendingin er á skrá mikudagar kl 16:05