Vága kommuna samtykt visjón fyri 2032

Hóast skuldin hjá Vága kommunu verður 85 prosent av einari álíkning, er kommunan væl fyri.

Tað sigur borgarstjórin, Bjarni Prior, í nýggjársrøðu sínari.

Skuldin verður 85 prosent, um allar íløgur í fíggjarætlanini fyri 2023 vera gjørdar.

Í fíggjarætlanini fyri 2023 er hallið góðar 24,4 mió. kr.

Býráðið hevur kortini samtykt at lækka skattin úr 22 prosentum niður í 21,75 prosent. Og barnafrádrátturin er farin úr 5.000 krónum upp í 6.500 krónur.

Stórar ætlanir

Býráðið í Vága kommunu hevur stórar ætlanir og hevur samtykt eina visjón 2032.

Borgarstjórin nevnir millum annað vinnuferðavinnu í røðu sínari.

Hann sigur, at saman við menningarstovuni Visit Vágar er Vága kommuna farin í gongd við arbeiðið at menna vinnuferðavinnu í kommununi.

Samstarv er við Tórshavnar kommunu, Visit Tórshavn og Hugskotið um verkætlanina Nýskapan í ferðavinnuni, sum byrjar nú í januar.

Seks umsóknir eru um at vera við í verkætlanini, tríggjar verkætlanir eru úr Vága kommunu.