Jenis hevur framvegis álit á Bill

Jenis av Rana, formaður í Miðflokkinum, hevur framvegis álit á Bill Justinussen, sum er varamaður hjá Miðflokkinum í løgtinginum.

Bill Justinussen er ein av eigarunum, umframt at hann er bólkhaldari í felagnum 20.10.20, sum í løtuni verður kannað av løgregluni.

Løgreglan kannar millum annað, um felagið hevur brotið lógina um arbeiðs- og uppihaldsloyvi.

Jenis av Rana, Fólkatingssvalið 2022, 16:9

Mynd: Bjarni Árting Rubeksen

Eingin er dømdur

"Eingin er dømdur í málinum, og tí er álitið á Bill Justinussen ikki skalað," sigur Jenis av Rana, formaður Miðfloksins.

Av tí at talan er um eitt politimál, so vil Jenis av Rana ikki gera fleiri viðmerkingar, fyrr enn ein niðurstøða er í málinum. 

Bill Justinussen heldur tískil fram sum varamaður hjá Miðflokkinum. 

Farhat´sa Pitsa

Onga løn og útleigað

Felagið 20.10.20 hevur millum annað ikki rindað útlendskum starvsfólkum løn.

Fyrrverandi starvsfólkini hava í Kringvarpinum greitt frá, hvussu tey arbeiddu nógvar yvirtímar dagliga og ikki høvdu nakran frídag í fleiri mánaðir.

Afturat tí arbeiddu tey í eini pitsamatstovu í Saltangará, sum hoyrdi til eitt annað felag enn tað, teir sambært arbeiðsloyvinum, skuldu arbeiða hjá.

Í Degi og viku í gjár, segði Bill Justinussen, at orsøkin til, at starvsfólkini ikki fingu løn, var, at felagið 20.10.20 var í fíggjarligum trupulleikum.