Tvey innbrot á Landssjúkrahúsinum

Løgreglan hevur handtikið tveir ungar menn í sambandi við tvey innbrot á Landssjúkrahúsinum.

Fyrra innbrotið var 10. januar, har tjóvarnir hava tikið eitt nú fartelefonir, oyrasniglar og telduskíggjar.

Seinasta sunnumorgun var aftur innbrot á Landssjúkrahúsinum, og tjóvarnir hava verið víða og hava m.a. brúkt tunnilin, sum knýtir Landssjúkrahúsið saman við bygningunum oman fyri vegin, á Eirargarði.

Tjóvarnir hava m.a. verið í bygninginum, har umsitingin heldur til, og har hava teir sagað hurðar upp.

Væl útgjørdir

Vakmyndatól eru í bygningunum hjá Landssjúkrahúsinum, og á upptøkunum sást, at menninir vóru væl útgjørdir. Teir vóru í drakt, handskum og munnbindi.

Og tí bar ikki til at fáa fingramerki ella DNA frá gerningsmonnunum.

Men saman við upptøkunum frá vakmyndatólunum og kriminaltekniskari útgerð bar til at finna fram til gerningarmenninar, 17 og 19 ára gamlir, sum týsdagin vóru handtiknir fyri innbrotið. 

Teir játta seg sekan, og løgreglan hevur funnið tjóvagóðsið.