Ársins ítróttafyrimynd: Jógvan Kristiansson Glerfoss

Heiðurslønin sum ítróttaFYRIMYNDIN verður latin einum íðkara, venjara, liðleiðara, nevndarlimi ella øðrum, ið tekur ítróttin í álvara, og sum er fyrimynd hjá hinum við sínum jaligum hugburði, bæði til venjing og kapping.

Og ítróttaFYRIMYNDIN 2022 er Jógvan K. Glerfoss, sum er venjari í Bragdinum.

Einastandandi engageraður

Tey, sum kenna Jógvan, siga, at hann er nærlagdur, nørdutur og tekur venjaragerningin í fullum álvara. Tað krevur bæði orku og tíð, men tær vanta ikki, sigur venjarin.

 -  Eg fái orku frá teimum ungu, og tað er so ótrúliga stuttligt at møta upp. Tað eru tey, sum áttu at fingið hesa fyrimyndina, segði Jógvan við 3-2, sum gjørdi innslag, tá tilnevningin varð kunngjørd.

Og forkvinnan í Bragdinum er sannførd um, at uttan Jógvan og venjaramakkaran Debes var als eingin ungdómsvenjing í felagnum. 

3-2 gjørdi eitt portrett av Jógvani K. Glerfoss í samband við tilnevningina sum ársins ítróttafyrimynd, og tað sæst niðanfyri.