Læknavaktin skal eisini lofta sálarsjúkum

Læknavaktin verður nú styrkt, so hon fær betri møguleikar at lofta teimum, sum ringja 1870, tí tey hava brúk fyri bráðfeingis hjálp til sálarligar trupulleikar.

Ætlanin um at styrkja læknavaktina er í samsvari við tilmæli úr heildarætlanini um sálarheilsu í Føroyum frá oktober 2018 og heildarætlanini um at fyribyrgja og tálma rúsevnisnýtslu í Føroyum 2022-2028 frá mars 2022. 

Í báðum heildarætlanum verður mælt til, at fólk, sum brádliga gerast illa fyri sálarliga, altíð skulu kunna ringja og fáa bráðfeingis hjálp.

Tað er ein meting hjá kommunulæknanum ella læknavaktini sum avger, um sjúklingar hava brúk fyri meting ella viðgerð á sjúkrahúsi, sama, um talan er um likamliga ella sálarliga sjúku, sigur Heilsumálaráðið.

Læknavaktin er ætlað teimum, sum fáa bráðfeingis tørv á læknahjálp, og ikki kunnu bíða, til viðtalan hjá egnum kommunulækna letur upp aftur.