Ætla at byggja sólorkuskipan á Fútakletti

Alifyritøkan Hiddenfjord hevur ætlanir um at seta upp sólorkuskipan á tekjuna á smoltstøðini á Fútakletti. 

Tá skipanin er fult útbygd, fer hon at fevna um 6.000 sólføt - sólpanel - ella tilsamans 15.000 fermetrar. 

Fult útbygd, fer elframleiðslan at vera umleið 1,3 mió. kilowatt-tímar um árið, sum svara til ársnýtsluna hjá 300 sethúsum. 

Atli Gregersen

Atli Gregersen er stjóri í Hiddenfjord.

Eitt minus er, at streymurin frá skipanini má seljast til SEV fyri bíligari prís, enn hann verður keyptur aftur fyri, sigur Atli Gregersen, stjóri í Hiddenfjord.

Sambært grein 16 í elveitingarlógini skal umhvørvisárinsmeting gerast og góðkennast av Umhvørvisstovuni, áðrenn loyvi til framleiðslu av ravmagni verður givið. 

Í árinsmetingini, sum er send til hoyringar hjá viðkomandi pørtum, skal verða mett um, hvørjar møguligar avleiðingar ætlaða virksemið kann hava fyri náttúru og umhvørvi. 

Atli Gregersen væntar ikki, at tað verður nakar trupulleiki at fáa endaligt loyvi til sólorkuskipanina.