103 vindmyllur upp í Hetlandi

Hetlendingar eru nú farnir undir at seta ikki færri enn 103 vindmyllur upp á hetlendska meginlandinum.

Tað veit Orkan.fo at siga frá hetlendsku bløðunum, og Shetland News og Shetland Times.

Vindmyllulundin hjá Viking Energy er á øllum breddum og forsíðum í Hetlandi í hesum døgum.

Millum annað hava hetlendingar somu avbjóðingar sum føroyingar, tá ið umræður at flyta teir 57 metra longu veingirnar eftir vegunum.

Men fyrstu veingirnir komu fram uttan stórvegis trupulleikar, so higartil sær út til, at arbeiðið gongur eftir ætlan.

Danska vindmyllufyritøkan, Vestas, sum er veitari og stendur fyri at seta myllurnar upp, hevur sett sær fyri at fáa sett allar 103 vindmyllurnar upp í hesum árinum.