Fiskimálaráðið fríkent

Málið byrjaði afturi í 2014, tá ið eitt skip hjá Thor ikki fekk royndarloyvi at fiska stinglaks, og tí stevndu Thor og BankNordik Fiskimálaráðnum.

Endurgjaldskravið hjá Thor og BankNordik ímóti Fiskimálaráðnum var komið upp í slakar seks milliónir krónur.

Føroya Banki keypti djúpvatnstrolaran “Phoenix” á tvingsilssølu tann 25. november í 2008, og síðst í 2009 keypti Thor skipið frá bankanum.

Einki royndarloyvi
Áðrenn hann fór á tvang, hevði “Phoenix” saman við tveimum øðrum skipum royndarloyvi at fiska stinglaks.

Vanligt er, at fiskiloyvi eru við, tá skip verða seld á tvingilsuppboði, og í bankanum og Thor hildu tey eisini, at “Phoenix” hevði royndarloyvi at fiska stinglaks.

Men har var einki royndarloyvi at fiska stinglaks.

Thor og BankNordik, sum skulu gjalda Fiskimálaráðnum 225.000 krónur í sakarmálskostnaði, hava nú møguleika at royna níggju ára gamla málið í Landsrættinum.