Sjóneykuna á virðisvøkstur

Mikudagin 19. apríl skipar Fiskivinnuráðið fyri ráðstevnu um virðisvøkstur í fiskivinnuni.

Tveir gestarøðarar vera við, annar úr Norra og hin úr Íslandi, og báðir hava drúgvar royndir við virðisøking í fiskivinnuni.

Margareth Kjerstad úr Norra er granskingarleiðari á C Food Norway, sum framleiðir hádygdarvørur úr hjávørum, so sum høvd, bein og innvøli.

Hin fyrilestrarhaldarin verður eitt umboð frá Matís í Íslandi, sum hevur arbeitt við tí sama í mong ár.

Føroyskar framløgur
Somuleiðis verða framløgur frá umboðum úr føroysku fiskivinnuni, sum hava gjørt sær royndir innan økið.

Hesar fara serliga at leggja dent á møguleikar, forðingar og hvat krevst fyri at menna hjávørur úr botnfiskiskapinum til hávirðisvørur, og hvussu uppsjóvartilfeingið kann virðisøkjast meira.

Advent Management samskipar ráðstevnuna, sum verður á Hotel Føroyum.