Jinping hittir Putin í Moskva í dag

Kinesiski forsetin, Xi Jinping, er komin til Russlands og fer í dag at hitta russiska forsetan, Vladimir Putin, í Moskva.

Undan fundinum sigur Xi, har tað kann vera torført at enda kríggið í Ukraina.

- Eingin einføld loysn er á torgreiddum trupulleikum, skrivar Xi í eini grein í russiska blaðnum Rossiiskaya Gazeta, sum russiski staturin eigur.

Russiski forsetin, Vladimir Putin, tekur væl ímóti ætlanunum hjá Kina um at hava uppbyggjandi leiklut í ósemjuni um Ukraina.

Putin sigur í grein í kinesiska blaðnum Renmin Ribao,  Fólksins dagblað, undan vitjanini, í dag, at hann er takksamur fyri, at Beijing hevur javnvigaða støðu í Ukraina-ósemjuni.

Viðurskiftini eru góð

Viðuskiftini millum Russland og Kina eru góð og eru enntá betri enn undir kalda krígnum, skrivar Putin í greinini.

Putin skrivar eisini, at Russland og Kina vilja hava rættvísa heimsskipan.

- Saman við samsintum fara okkara lond á skipaðan hátt at byggja upp eina rættvísa og fjølbroytta heimsskipan, sum er grundað á lóg og ikki á nakrar reglur, sum bara tæna áhugamálunum hjá "gull-milliardini", skrivar Putin.

Hugtakið "gull-milliard" er tilsiping til rík lond, sum stuðla Vesturheiminum.

Ætlan í 12 stigum

Kinesiskir myndugleikar hava undan fundinum í dag lagt fram ein ætlan í 12 stigum, sum Beijing heldur er rætta uppskriftin fyri at fáa vápnahvíld og síðani at enda ósemjuna í Ukraina.

Ukraina er jaligt um partar av avtaluni, men tað er USA ikki, skrivar Reuters.

Xi Jinping vitjar í Russlandi í tríggjar dagar.