TARAS vann “Ungt Virki 2023”

TARAS, sum eru fýra næmingar úr Tekniska Skúla í Klaksvík, vunnu ársins útgávu av íverksetarakappingini, “Ungt Virki”, sum var á Miðnámi á Kambsdali í gjár.

Olaf á Grønastøð, Kári Johannessen, Rói Reinert Hansen og Silas Gaard manna TARAS, ið vann høvuðsvinningin, sum var 5.000 krónur.

Tí skulu teir fýra eisini umboða Føroyar í stóra finaluumfarinum í Kjøpinhavn mikudagin 26. apríl, tá ið 42 tey bestu íverksetaraliðini í ríkinum fara at kappast.

Stívilsi úr tara
TARAS vann við eini verkætlan, ið tekur støði í burðardyggari framleiðslu av stívilsi úr føroyskum tara, millum annað til fóðurframleiðslu til føroysku alivinnuna.

Nummar tvey gjørdist bólkurin, BEHR frá Glasi, sum framleiðir smáar stílfullar mótataskur úr endurnýttum súkkluslangum.

Og nummar trý gjørdist bólkurin, Kloddi á Glasi, sum framleiða ullklæddar puffar úr gomlum bildekkum og endurnýttum føroyskum troyggjum.

Níggju dómararnir úr føroyska vinnulívinum mettu um tilsamans 16 verkætlanir hjá 54 næmingum úr Tekniska Skúla í Klaksvík, Miðnám á Kambsdali og Glasi, sum kappaðust í “Ungt Virki”.